集運


集運整理

經常有人問用邊間集運好,一個人無可能試晒咁多間,盡量整合網友介紹過既集運,以作參巧。合作快遞、收費變動頻繁,難以逐一列出及保持更新,請自行比較。用前最好再自行評估可信度,畢竟集運尋日好今日未必好,人地用過好你用又未必好,用集運都好講時辰八字。(依旺旺ID字母筆劃排序)

優質服務類(4.9+x3, 99+%)

廣東廣州
511824708hai:大貨優惠、自家港車
dingbotao888(丁波濤)
hechanglian0808(趙鵬)
kwh162539(孔維華)
shuliqin5299(舒麗琴)
lihuiyan2616
zhouxiaoping815(周小平)
四葉草男生:可whatsapp/QQ聯系
美之屋0520

廣東深圳
kj8620(金牌集運):大貨優惠、自家港車、小貨非全港派送﹐另有提供家具搬運組裝拆走服務
天涯情深深(立信):大貨優惠、貨件獨立秤重(泡貨不能與重貨拉上補下)、有呃秤紀錄
梧桐語e點通

 

江蘇蘇州
時尚雅居_2009

價錢相宜類

神州集運:自助領貨、有失貨拖貨紀錄

香港經營類

DimBuy:自助領貨、便利店取貨服務、旺角/觀塘/灣仔/澳門自取點
Hoyoyo
香港便利購:京廣自家集運、有失貨後態度差紀錄

地區自取類

ebuy1010hk:旺角自取
funlala:深水埗/長沙灣/灣仔/旺角/火炭自取點、自助領貨
sum9327:元朗/天水圍約時間自取點、facebook/whatsapp聯絡(已結業)
郭偉良2012:天水圍約時間自取點、whatsapp聯絡

高危慎用類

秀天通壐:浙江廣東收貨地址,免費合併發貨、有延遲發貨上報紀錄
香港良心集運多寶):自助領貨、觀塘/旺角/沙田/葵芳自取點、有扣貨上報紀錄


集運FAQ

咩係集運?
集運係中轉公司,幫我地先貨,再轉到香港。
我地響淘寶買野時,收貨地址填集運響內地既收貨地址,等集運幫我地收齊貨之後,就請集運幫我地用快遞或者物流轉寄到我地香港地址。
集運係普遍香港人同集運之間既叫法。如果同內地人溝通,佢地會唔知咩係集運,傾完成個鐘都仲係雞同鴨講,但只要同佢地講用中轉,佢地就多數都明。

點解要用集運唔用淘寶官方國際轉運服務?
淘寶網官方國際轉運服務都已經幾成熟,不過私營集運仲有好多生存空間,因為國際轉運服務好多野都唔送得,睇下順豐個國際轉運禁運品目錄就知喇。用集運就唔同,無人會理你運咩,只要睇下香港海關進口管制,唔犯法就得喇。又例如小米盒子,香港有代理,涉汲版權問題,正規途徑已經被封殺左喇。

咩係快遞?
快遞係送貨公司,例子:DHL、順豐。同集運係唔同既。
經常有人混淆集運同快遞,受完快遞氣走去劣評集運,係非常唔文明既行為。
集運幫我地收貨,再用快遞發貨比我地。
如果集貨領貨過程唔流暢,係間無運唔好,請轉集運。
如果發貨後快遞送貨慢,快遞哥哥唔禮貌/約好時間甩底,係快遞唔好,唔需要轉集運,只需要轉快遞。受左快遞哥哥氣,轉集運唔轉快遞,好大機會要再受氣一次。

咩係物流?
物流同快遞一樣,係送貨公司。不同於,物流主要運送較大的重型貨件,收費較平。物流多數唔送貨上門,只會送到指定貨倉/提貨點,通常可以要求加錢送貨,上唔上門要再傾。
一般有提供大貨優惠既集運,都有物流提貨服務,收費由¥50-80不等,視乎唔同貨倉遠近距離,購物前應先分別搵賣家和集運確認物流公司和提貨價錢。經賣家加錢比物流公司送貨到集運門口會比較方便同平,但都最好夾下價先。

點解集運咁好幫我地收貨?
集運通常有合作開既快遞公司,快遞公司會有優惠價錢比佢地,佢地再收我地正價或者貴少少,賺個差額。

點解要用集運?
用集運運費會平啲、慳啲時間。有啲賣家拒絕寄香港。
深圳直送香港每公斤首重¥30續重¥6,深圳寄深圳每公斤首重¥8續重¥1。
三件貨例子:
寄三件分別重1公斤既貨到香港,要¥30*3=¥90。
若同樣三份件先寄到集運,再轉寄香港,運費係內地運費:¥8*3=¥24+寄港運費:¥30+¥6*2=¥42,共¥66。
十件貨例子:
寄十件分別重1公斤既貨到香港,要¥30*10=¥300。
若同樣十份件先寄到集運,再轉寄香港,運費係內地運費:¥8*10=¥80+寄港運費:¥30+¥6*9=¥84,共¥164。
如果送住宅或偏遠地方有附加費,集埋送就可以由三/十次附加費節省為一次附加費。
有時候賣家會做包郵優惠,一般都只包國內郵費,香港呢個特別行政區多數無份,用集運就可以得到幾乎內地人既待遇。
慳時間係副產品,由要等收三/十次貨變成等一次貨。

用集運有咩風險?
如果收到貨物時發現有問題,正常賣家需要承擔以同樣發貨方式來回退換貨既運費。
例如:賣家由深圳用快遞發貨到深圳,用左¥8,如果證明到係貨件本身有破損,賣家需要承擔來回¥16快遞運費。用集運,件貨到左香港我地先檢查到有問題,而香港寄上深圳並無方便相宜既途徑,最少要¥30運費,同時賣家亦只需要承擔最多¥16運費。仲未計電子產品或者有牌子貨品寄唔番上去。更甚者,要親身帶件貨上大陸寄。變相除非件貨好貴,否則最終都只係多一事不如少一事。
對應方法,係揀啲評價信譽比較高既商家(請參巧分辨淘寶商戶心得)。
信譽好既賣家就算遇到問題,比較願意協商,話比佢地知件貨已經到左香港退貨唔方便,有機會可以傾到退返部分款項,或者直接補寄過另一件或者破損部分配件。
遇上信譽唔好既,可能會堅持依據淘寶條款,即使明明件貨只值¥16,佢包個來回運費已經要¥16,仲未計件貨既成本,都要你寄番件爛貨比佢。就算唔知件貨響香港唔方便退貨,佢地都會堅持,因為睇評價,唔少內地人會嫌麻煩算數,而我地香港人,即使想退都無得退,有苦自己知。

集運要點用?
而家集運發展得好成熟,唔同集運發展成唔同領貨取貨流程,唔可以一個教學教得晒,流程要睇番目標集運既介紹。而有幾樣野一定唔會錯,可以提點一下。
.第一次用集運之前,最好聯絡一下集運既掌櫃/客服。有時遇上旺季爆倉,唔少集運會唔接新客。順便可以觀察客服既回覆速度、對答態度,如果未做你生意已經回覆慢態度差,將來萬一有貨件出事要請佢地幫忙更加唔洗旨意。
.決定好用一間集運,可以去淘寶賬戶管理新增一個收貨地址,內容填集運提供既資料,最好跟足集運指示格式,每間集運有唔同系統,自把自為亂填只會令到自己領貨比其他人慢。預設地址亦轉為集運地址,購物車結算可以睇到店家預設運費,如果運費設定合理,可以提交訂單自助購物。
.拍下付款後,等賣家發貨提供物流運單號,按已買到的寶貝查看物流可以查物流狀況。
運單號
查看物流至新頁面,見到簽收成功XXX已簽收投妥字眼,即貨件已到集運度。唔少集運都需要我地提供物流公司運單號碼(不同物流編號),在下圖左邊。
簽收
.等所有貨物簽收好,認領貨件,請集運發貨到香港地址。步驟每間集運都有少少唔同,睇番集運介紹喇。

咩係體積重/泡重?
體積重係依照貨件體積去計算收取運費既重量。
假如你買一粒黃豆,用一個貨櫃車咁大既紙盒裝,請快遞幫你送貨,如果快遞按照粒黃豆再加埋紙箱既重量收費,咁快遞就蝕到入肉啦。所以對於大而輕既貨,快遞/物流係會收取體積重。
一般體積重計算方法:體積重(kg)=長(cm)x濶(cm)x高(cm)/6000
有啲集運會收平啲,除8000。
快遞,順豐,較遠地區如江浙滬送香港,可以揀順豐特惠,即係陸運,除12000,平一半。


以下係討論區貼出FAQ後網友追加題問,先貼出黎先,遲下再整理番。

請問用集運,是否先向集運公司溝通然後再拍?拍前向賣家提供集運資料?
大部分情況唔需要, 直接用集運地址當係自己地址拍+付款就OK. 有啲JM會備註留言, 希望用細個啲既盒/包裝得好啲, 希望壓低少少轉送香港既體積運費/打爛野既機會.
但如果買大型傢俬電器, 同賣家講清楚, 問定貨件尺寸, 可以預算到運費/走物流既提貨費, 有時直送香港反而會抵啲.

物品的最後重量(包裝後)由賣家決定還是集運公司?因為以前速遞香港,好多時叫你到付,有些店子把物件大大大打包,結果很重(懷疑興速遞合作),所以我都會叫他輕包,尤其是一般物件。
送港包裝重量係集運公司決定. 想穩陣啲唔想被呃秤, 唯一辦法係搵啲信譽好啲既集運.
正常送港運費到付, 有無同速遞合作呃秤唔知, 但係包得大件可以係保障佢地自己既方法之一, 因為件貨爛左佢地要負責.

我想問下”確認收貨”, 是貨物到了集運後確認, 還是自己收到貨後才確認呢? 謝謝!
賣家發貨後有10日時間確認收貨。如果集貨既單數唔多,就住先買遠既地方後買近既地方,預啲貨差唔多日子到集運度,一集齊貨即刻轉送到香港,正常情況下可以等到香港收貨後先確認。不過如果中途有阻滯,有賣家/快遞唔生性拖遲左,可以自己響淘寶系統度申請延遲三日。如果三日都仲唔夠,可以同賣家解釋你用中轉,實際件貨未到手,要求賣家幫你延遲確認收貨。
個人經驗係,願意負責任既店舖,即使你自動確認後十日八日先同佢地講你個情況,佢地大多會積極協商解決問題。無良店舖就算你未確認收貨,出左問題都會左推右推,最壞情況係抵賴話你唔係響快遞面前拆貨,佢地唔會負責。所以講到尾,揀間信譽好既店舖比延遲確認收貨重要。

我看了幾家集運的網頁,比較複雜。因為我一向用順豐,不過佢費用越來越貴。
當我拍了後,是否直接通知賣家我用那家集運,賣家是否自己通知集運來取件?

不是,否。集運一般只做收貨同搵快遞轉寄啲貨比你。除非買大型傢俬,物流唔送上門,只送到提貨點,集運先會代你提貨。

是不是我拍了幾家的店後,然後到集運公司再拍要選的運送地點?
用集運買野流程同原來直送香港一樣,分別只係個地址/收件人改成集運既資料。如果你無另外同賣家講,對賣家黎講,只係集運響佢地店買左野。

集運何時收取費用?
大部分集運會響你要求發貨到香港時,秤你啲貨幾重,再要求你拍下淘寶連結,付款。直至你收貨後,你再確認收貨。不過集運有唔同營運模式,每間收費方式唔同,最好都係睇番目標集運既網頁/問佢地客服。

如果賣家承擔運費,我是否不用付集運?否。淘寶賣家一般講承擔運費,都只限寄內地既運費。如果用集運,我地只能夠慳到賣家>集運運費。集運>香港集運要自己比。

是否所有集運基本上集齊物都會送到香港,是否要另外再拍送香港?
基本上所有集運你唔提出集齊貨,集運唔主動送到香港,所以要另外再拍/經集運既系統要求送貨到香港。要留意係,唔同集運有唔同免費存倉期,要睇清楚條款細則。
不過集運有唔同營運模式,有個別集運係會無條件先送香港,但屬於少數。

簡單D係咪我同10間鋪買野,地址都係填集運喇,

但係有時賣家發貨時間唔同,我可以點樣令集運公司儲埋先一次寄回香港,
假設目標集運收貨地址響廣東省。通常廣東>廣東1-3日,浙江/四川>廣東4-5日,北京>廣東5-7日,黑龍江>廣東7-10日。睇下賣家所在地,對住中國地圖,估下大約正常快遞要幾多日送到。通常先拍浙江店,等2日再拍廣東店,正常會差唔多時間到貨運度。見到收齊貨,先通知集運發貨到香港。

同埋佢地儲晒D野係咪都會同箱集埋一齊,方便到時一齊最,甘收費又會唔會再貴左??THX~~
通常集運會用尼龍織袋+封箱膠紙打包好所有貨,個尼龍袋本身好輕,唔會因為咁而貴左。就算要當尼龍袋同封箱膠紙有重量,都值得比,因為啲貨散修修,唔見左一件就已經夠蝕喇。

我想問下係淘寶點搵D集運公司,
淘寶可以搜關鍵字就係集運,鍾意可以再加住宅自取工商

2 thoughts on “集運

Leave a Reply

Your email address will not be published.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Current day month ye@r *